လိင်တူစုံတွဲများ ပထမဆုံး ပါဝင်ယှဉ်ပြိုင်ခဲ့သည့် Tango ကမ္ဘာ့ချန်ပီယံရှစ်

အာဂျင်တီးနား နိုင်ငံတွင် ကျင်းပပြုလုပ်သည့် Tangoအက ကမ္ဘာ့ချန်ပီယံရှစ် ပြိုင်ပွဲတွင် ထူးထူးခြားခြား အခြေအနေ တစ်ရပ်အဖြစ် လိင်တူစုံတွဲအချို့ ပါဝင်ယှဉ်ပြိုင်ခဲ့ကြောင်း သိရသည်။ ဗျူနိုအေးရီးစ်မြို့ရှိ လူနာပါ့ခ် အားကစားရုံကြီးတွင် ကျင်းပသော ပြိုင်ပွဲကို ကမ္ဘာ့နိုင်ငံ (၃၇)ခုမှ စုံတွဲ (၅၀၀)ကျော် ပါဝင် ယှဉ်ပြိုင်ခဲ့ကြသည်။ ပြိုင်ပွဲတွင် အများမျှော်လင့်ထားသည့်အတိုင်း အိမ်ရှင် အာဂျင်တီးနားမှ စုံတွဲများပင် အကောင်းဆုံး အကအရည်အသွေးများဖြင့် အောင်ပန်းဆင်နိုင်ခဲ့ကြသည်။ ဂျက်ဆီကာ အာဖန်နိုနီနှင့် မက်စီမီလီယာနို ခရစ္စတီယာနီတို့ စုံတွဲသည် အကောင်းဆုံး အကအလှများဖြင့် ဒိုင်များ၏ အံ့ဩချီးကျူးမှုကို ရယူနိုင်ခဲ့ပြီး Salon Tango ပြိုင်ပွဲတွင် ဗိုလ်စွဲခဲ့သည်။

ချန်ပီယံရှစ်တွင် Salon Tangoနှင့် Stage Tangoဟု ပြိုင်ပွဲအမျိုးအစား နှစ်ခု ခွဲခြားကျင်းပပြီး Stage Tangoတွင်လည်း အာဂျင်တီးနား စုံတွဲဖြစ်သည့် ဂွီဒိုပလာစီယို့စ်နှင့် ဖလိုရန်စီယာ ကက်စ်တီလာတို့က အောင်ပွဲခံခဲ့သည်။ ယခုဗိုလ်စွဲသူများသည် ပေါင်စတာလင် (၄၅၀၀)စီ ဆုကြေး ချီးမြှင့်ခံရပြီး ပြင်သစ်နိုင်ငံ၊ ပါရီမြို့တော်သို့ သွားရောက်ဖျော်ဖြေခွင့်လည်း ရရှိခဲ့ကြသည်။ (၂)ပတ်ကြာ ကျင်းပသည့် ပြိုင်ပွဲသည် အာဂျင်တီးနား၏ ရိုးရာအမွေအနှစ် တစ်ခုဖြစ်သော Tangoအကကို ထိန်းသိမ်းမြှင့်တင်ရန် ရည်ရွယ်ခဲ့ခြင်း ဖြစ်သည်။ အဆိုပါ အကသည် အာဂျင်တီးနားနှင့် ဥရုဂွေးတို့ကြား (၁၉)ရာစု နှောင်းပိုင်းများတွင် စတင် တီထွင်လာခဲ့သည်။

ယခုချန်ပီယံရှစ်၏ ထူးခြားမှုမှာ ဒိုင်လူကြီးများက လိင်တူစုံတွဲများကို ပါဝင်ရန် ပထမဆုံးအကြိမ် ခွင့်ပြုပေးလိုက်ခြင်း ဖြစ်သည်။ ထို့ကြောင့် အမျိုးသားစုံတွဲ (၃)တွဲနှင့် အမျိုးသမီးစုံတွဲ (၁)တွဲတို့ စာရင်းသွင်း ယှဉ်ပြိုင်ခဲ့ကြသည်။ ယင်းတို့အနက် ဗင်နီဇွဲလားမှ အသက်(၁၈)နှစ်အရွယ် ဒန်နီရယ်လ် အာရိုယိုနှင့် အာဂျင်တီးနားမှ အသက်(၃၄)နှစ်အရွယ် ဟွမ်ပက်ဘလို ရာမီရက်ဇ်တို့ အမျိုးသား စုံတွဲကို ပရိသတ်များက အားပေး ချီးကျူးခဲ့ကြသည်။ "Tangoမှာ ခွဲခြားတာဆိုလို့ ပြိုင်ပွဲ အမျိုးအစား (၂)ခုပဲ ရှိတယ်။ လိင်သတ်မှတ်ချက် ခွဲခြားတာမျိုးက မလိုအပ်ပါဘူး"ဟု ရာမီရက်ဇ်က ပြောဆိုသွားခဲ့သည်။

လိင်တူစုံတွဲများကို ကမ္ဘာ့ချန်ပီယံရှစ်တွင် ပါဝင်ခွင့် ပေးလိုက်ခြင်းသည် အာဂျင်တီးနားက လိင်တူစုံတွဲများအပေါ် ပိုမိုပွင့်လင်းသည့် အမြင်ဖြင့် လက်ခံလာခြင်းကို ပြဆိုသည့် သဘောမျိုးလည်း သက်ရောက်လာသည်။ အာဂျင်တီးနားသည် လက်တင်အမေရိက ဒေသတွင် လိင်တူချင်း လက်ထပ်ခွင့်ကို စံပြုအနေဖြင့် စတင်လက်ခံသော နိုင်ငံဖြစ်ပြီး ဗျူနိုအေးရီးစ်သည် လိင်တူစုံတွဲများ အနှစ်သက်ဆုံး ပျော်မွေ့သည့် မြို့တော်တစ်ခု အဖြစ်လည်း နာမည်ရခဲ့သည်။

Planet Myanmar Network